09:19
Duru za kuaminika nchini Misri zimeripoti kuwa Muhammad Morsi,
rais wa nchi huyo aliyeondolewa madarakani na jeshi amesema hana
pingamizi yoyote na hukumu ya kifo iliyotolewa dhidi yake na mahakama ya
jinai ya Cairo. Mtandao wa habari wa Alyaumus sabi'i ulioko karibu na
serikali ya Cairo umeripoti kuwa wakati akirejeshwa jela ya Burj al Arab
baada ya kutolewa hukumu ya kifo dhidi yake kuhusiana na kesi ya
kutoroka jela ya Wadin Natrun, Morsi alisisitiza kwamba yeye ni rais
halali wa Misri, na kwa sababu hiyo hatokata rufaa dhidi ya hukumu
iliyotolewa na mahakama ya mwanzo. Mahakama ya jinai ya Cairo jana
ilitoa hukumu ya kifo dhidi ya Muhammad Morsi na zaidi ya watu wengine
mia moja wakiwemo viongozi na wanachama wa harakati ya Ikhwanul Muslimin
na kuiwasilisha hukumu hiyo kwa Mufti Mkuu wa nchi hiyo. Hukumu hiyo
imelalamikiwa na kupingwa vikali ndani na nje ya Misri. Radiamali ya
karibuni kimataifa imetolewa na Katibu Mkuu wa Umoja wa Mataifa Ban
Ki-moon ambaye mbali na kulaani hukumu hiyo amewataka viongozi wa Misri
kutochukua hatua ambayo itadhoofisha amani, uthabiti na utawala wa
sheria katika eneo. Ban aidha amesema anafuatilia kwa makini mwenendo wa
matukio hayo yanayojiri nchini Misri. Wakati huohuo Usama Morsi, mtoto
wa kiume wa Morsi amesema hukumu hiyo ya mahakama ya jinai ni sehemu ya
vita vya kinafsi na kisiasa vya utawala wa wafanya mapinduzi ya kijeshi
dhidi ya Mapinduzi ya wananchi wa Misri na shakhsia wa mapinduzi hayo,
na kuongeza kuwa wafuasi wa Ikhwanul Muslimin wameanzisha harakati dhidi
ya hukumu hiyo, muhimu zaidi ikiwa ni kuendeleza wimbi la mapinduzi kwa
lengo la kufuta hukumu hizo batili. Usama Morsi amesisitiza kwamba
katika siku zijazo Misri itashuhudia matukio ya kushangaza
No comments
Post a Comment