Wakimbizi wa Burundi wafariki Tanzania

Wakimbizi wa Burundi wafariki Tanzania

     Raia saba wa Burundi wamefariki dunia wakiwa nchini Tanzania kufuatia mlipuko wa ugonjwa wa kuhara... 02:31

    

Raia saba wa Burundi wamefariki dunia wakiwa nchini Tanzania kufuatia mlipuko wa ugonjwa wa kuhara miongoni mwa wakimbizi wa Burundi waliofika hivi karibuni nchini humo. Shirika la Umoja wa Mataifa la Kuhudumia wakimbizi UNHCR, kwa ushirikiano na serikali ya Tanzania linachukua hatua za dharura kudhibiti mlipuko huo. Katika taarifa iliyotolewa Jumapili, UNHCR imesema kuwa wakimbizi saba wameshafariki dunia tangu Jumatano, wawili wakiwa wamebainishwa na dalili za kipindupindu. Aidha Warundi 77 kwenye kambi ya Nyarugusu, magharibi mwa mkoa wa Kigoma, na wengine 300 kwenye kijiji cha Kagunga nchini Burundi na Kigoma nchini Tanzania wanatibiwa kwa sababu ya ugonjwa wa kuhara. Mwakilishi wa UNHCR , Joyce Mends-Cole amesema kipaumbele cha shirika hilo ni kushirikiana na wizara ya afya nchini humo ili kufungua haraka kituo cha kutibu kipindupindu kwenye kijiji cha Kagunga, akieleza kwamba kuna kituo kimoja kidogo tu cha afya kwenye kijiji hicho. Halikadhalika UNHCR inachukua hatua za kuimarisha usafi na mifumo ya kusafisha maji machafu, pamoja na kuhamisha wakimbizi kutoka Kagunga hadi Kigoma na kambi ya Nyarugusu Kwa mujibu wa mamlaka za serikali ya Tanzania, idadi ya wakimbizi kutoka Burundi imefikia 70,000 nchini Tanzania, 50,000 wakiwa wanaishi kwenye mazingira magumu kwenye kijiji cha Kagunga.