Cannavaro, Kiemba watemwa Taifa Stars

Cannavaro, Kiemba watemwa Taifa Stars

Dar es Salaam. Nahodha wa timu ya taifa ya Tanzania ‘Taifa Stars’,   Nadir Haroub ‘Cannavaro’ na kiungo Amri Kiemba wameachwa katika  kik... 02:11

Dar es Salaam.Nahodha wa timu ya taifa ya Tanzania ‘Taifa Stars’,   Nadir Haroub ‘Cannavaro’ na kiungo Amri Kiemba wameachwa katika  kikosi cha timu hiyo kinachotarajiwa kuondoka leo jioni kwenda Afrika  Kusini kushiriki mashindano ya Kombe la Cosafa.

Kocha wa timu hiyo Mart Nooij amewaacha wachezaji sita katika kikosi  hicho kutokana na sababu mbalimbali.

Cannavaro ameachwa kutokana na kuwa majeruhi wa kifundo cha mguu aliyoyapata katika mchezo wa kwanza wa Kombe la Shirikisho dhidi ya   Etoile du Sahel ya Tunisia uliofanyika jijini Dar es Salaam.

Nahodha huyo anaungana na wachezaji wengine majeruhi walioachwa ambao ni kipa Aishi Manula, beki Hassan Isihaka na mawinga Haroun  Chanongo na Kelvin Friday wakati Kiemba ameachwa kutokana na matatizo ya kifamilia.

“Baada ya kupimwa afya na madaktari wamebaini Manula, Isihaka, Chanongo, Friday na  Cannavaro bado ni majeruhi na hawatasafiri na timu kesho.”

“Watabaki nchini wakiendelea kufanya mazoezi chini ya ungalizi mpaka timu itakaporejea kutoka Afrika Kusini na kuungana kwa ajili ya maandalizi ya Afcon,” alisema Ofisa Habari wa TFF, Baraka Kizuguto.  Kuhusu Kiemba ambaye uteuzi wake ulizua gumzo kutokana na kiungo huyo kukosa namba ya kudumu katika kikosi cha Azam kwa sasa, Kizuguto alisema Kiemba amepewa ruhusa kutokana na kuwa na matatizo ya kifamilia.

Kizuguto alisema msafara wa Taifa Stars utaongozwa na Mjumbe wa Kamati ya Utendaji wa TFF, Ephaphra Swai ukijumuisha wachezaji 20 na benchi la ufundi na timu hiyo inatarajiwa kufikia katika Hoteli ya Sun City iliyopo pembeni kidogo ya Jiji la Rusterburg.

Michuano ya Cosafa itaanza Mei 17 hadi Mei 30, kwenye viwanja vya  Olympia Park na Moruleng katika Jimbo la North West Province nchini Afrika Kusini.
MWANANCHI