08:30
Shirika la Kujihami la Nchi za Magharibi NATO limetangaza kuwa,
lipo tayari kutoa msaada wa kiulinzi kwa serikali ya Libya. Hayo
yamesemwa na Jens Stoltenberg, Katibu Mkuu wa shirika hilo kando ya
kikao cha Mawaziri wa Mambo ya Nje na Ulinzi wa jumuiya hiyo huko mjini
Brussels, Ubelgiji kikao ambacho kimeitishwa kwa lengo la kuchunguza
njia za kukabiliana na magendo ya binaadamu. Stoltenberg amesema kuwa,
sanjari na NATO kuunga mkono juhudi za Umoja wa Mataifa kwa ajili ya
kufikiwa makubaliano ya kisiasa na pande za mapigano nchini Libya,
lakini pia iko tayari kuipatia nchi hiyo ya kaskazini mwa Afrika msaada
wa kiulinzi ili iweze kuunda serikali ya umoja wa kitaifa. Aidha katibu
mkuu huyo wa NATO amekaribisha mazungumzo ya kina baina ya Umoja wa
Ulaya na Umoja wa Mataifa kwa ajili ya kupambana na wimbi la uhamiaji
haramu barani Ulaya. Suala la wahamiaji haramu kutumia maji ya Libya
kuelekea barani humo na hatari inayotokana na magendo hiyo, limeitia
wasi wasi jamii ya kimataifa. Ni vyema ifahamike hapa kwamba,
mashambulizi ya kijeshi ya nchi wanachama wa Jumuiya ya Kujihami ya Nchi
za Magharibi NATO dhidi ya Libya, hapo mwaka 2011, yamepelekea taifa
hilo kutumbukia katika dimbwi la machafuko makubwa yanayotokana na
ukosefu wa usalama nchini humo.
No comments
Post a Comment